آپ ﷺ کے چند متفرق ذوقیات:
کسی سے چیز لیتے تو سیدھے ہاتھ سے لیتے اور کوئی چیز دیتے تو سیدھے ہاتھ سے دیتے، خطوط لکھواتے تو سب سے پہلے بسم اللہ لکھواتے، پھر مُرسل کا نام اور اس کے پیچھے مرسل الیہ کا نام ہوتا، اس کے بعد اصل مضمون لکھواتے، خاتمہ پر مہر لگواتے۔
حضور ﷺ اوہام پرستی سے پاک تھے اور شگون نہ لیتے تھے، البتہ اشخاص اور مقامات کے اچھے نام پسند آتے، برے نام پسند نہ کرتے، سفر میں اقامت کے لئے ایسا ہی مقام انتخاب کرتے جس کے نام میں خوشی یا برکت یا کامیابی کا مفہوم ہوتا، اسی طرح جس شخص کے نام میں لڑائی جھگڑے یا نقصان کے معنی شامل ہوتے اسے کام نہ سونپتے، ایسے آدمیوں کونا مزد کرتے جن کے ناموں میں خوشی یا کامیابی کا مفہوم پایا جائے، بہت سے ناموں کو تبدیل بھی فرمایا۔
سواریوں میں گھوڑا بہت پسند تھا، فرماتے: گھوڑے کے عیال میں قیامت تک کے لئے خیروبرکت ہے، گھوڑے کی آنکھ، منہ، ناک کو اہتمام سے اپنے ہاتھوں سے صاف کرتے۔ شور، ہنگامہ اور ہڑبونگ اچھی نہ لگتی، ہرکام میں سکون و وقار اور نظم وترتیب چاہتے، نماز تک کے بارے میں کہا کہ بھاگم بھاگ نہ آؤ" علیک بالسکینتہ" (تمہارے لئے سکون ووقار لازم ہے)، یوم عرفہ کو ہجوم تھا، بڑا شور وہنگامہ تھا، لوگوں کو اپنے تازیانہ سے اشارہ کرتے ہوئے نظم وسکون کا حکم دیا اورفرمایا:
" فان البر لیس بالایضاع" (جلدی مچانے کا نام نیکی نہیں) (نقوش لاہور، رسول نمبر)
کدو:
حضور اکرم ﷺ کو سبزیوں میں کدو بہت پسند تھا۔ حضرت انس رضی اللہ عنہ سے حدیث مروی ہے کہ آپ ﷺ کو ایک دعوت میں جو کی روٹی اور کدو گوشت کا شوربہ پیش کیا گیا، میں نے حضور نبی کریم ﷺ کو دیکھا کہ پیالے کے کناروں سے کدو تلاش فرما کر تناول فرما رہے تھے، میں اس روز کے بعد ہمیشہ کدو کو پسند کرنے لگا۔
جو کی روٹی:
سرور کونین حضرت محمد ﷺ جو کی روٹی کو بہت پسند فرماتے تھے۔ حضور ﷺ نے اپنی ساری زندگی میں کبھی بھی میدہ کی روٹی تناول نہیں فرمائی، ابو داﺅد میں حدیث ہے کہ آپ ﷺ نے جو کی روٹی کا ٹکڑا لیا اور اس پر کھجور رکھی اور فرمایا کہ یہ اس کا سالن ہے اور تناول فرما لیا۔
روغن زیتون:
تاجدار انبیاء ﷺ نے روغن زیتون کو بڑا پسند فرمایا ہے۔ رسول اللہ ﷺ نے ارشاد فرمایا کہ زیتون کا تیل کھاﺅ اور مالش میں استعمال کرو، اس لئے کہ وہ مبارک درخت سے پیدا ہوتا ہے۔
سرکہ:
ہمارے پیارے نبی ﷺ کو سرکہ بھی بہت پسند تھا، آپ ﷺ نے نہ صرف سرکہ کو تناول فرمایا بلکہ اس کی تعریف بھی فرمائی۔ حدیث میں ہے کہ حضور اکرم ﷺ نے ارشاد فرمایا ہے کہ سرکہ بھی کیسا بہترین سالن ہے۔
کوئی تبصرے نہیں:
ایک تبصرہ شائع کریں